वीरगञ्ज । पर्सा प्रहरीले प्रतिबन्धित लागुऔषध खैरो हेरोईन सहित ४ जना भारतीय नागरिकलाई वीरगंजबाट पक्राउ गरेको छ ।

पक्राउ पर्नेमा बिहार, रक्सौल थाना अन्तर्गत वडा नम्बर १४ मौजे निवासी ३७ वर्षीय कृष्णा कुमार गुप्ता, ३८ वर्षीय सुधीर कुमार कुशवाहा, ४८ वर्षीय अमित कुमार र २७ वर्षीय चालक राजा कुमार रहेका छन ।

जिल्ला प्रहरी कार्यालय पर्सा तथा मातहतका प्रहरी चौकी इनर्वाबाट खटिएको संयुक्त प्रहरी टोलीले विशेष सूचनाका आधारमा प्रतिबन्धित लागूऔषध खैरो हिरोइनसहित चार भारतीय नागरिकलाई पक्राउ गरेको हो ।

वीरगञ्ज महानगरपालिका – १६ रजतजयन्ती चोकस्थित सडक खण्डमा संयुक्त प्रहरी टोलीले भारतबाट नेपालतर्फ आउँदै गरेका सवारी साधन तथा पैदल यात्रुहरूको नियमित चेकजाँच गरिरहेको क्रममा बीआर ०६ डीई ०००७ नम्बरको कालो स्कार्पियो गाडीलाई रोकी जाँच गर्दा गाडीको पछाडिको डिक्कीमा कार्पेटले छोपेर कालो प्लास्टिकको झोलामा लुकाइएको खैरो हिरोइन जस्तो देखिने पदार्थ बरामद भएको थियो ।

कृष्णा कुमार सवार रहेको गाडीबाट बरामद गरिएको लागूऔषधमध्ये एउटा पोका भित्र १०० ग्राम र अर्को पोकामा १२० ग्राम गरी जम्मा २२० ग्राम खैरो हेरोइन बरामद गरिएको पर्सा प्रहरीले पठाएको प्रेस विज्ञप्तिमा दाबी गरेको छ ।

पक्राउ परेका चारै जनाविरुद्ध लागु औषध सम्बन्धी कसुरमा पर्सा जिल्ला अदालतबाट पाँच दिनको म्याद थप अनुमतिसहित थप अनुसन्धान भइरहेको डिएसपी लम्सालले जानकारी दिए ।