वीरगञ्ज । वीरगञ्जस्थित गौतम स्कुलको ४८ औँ वार्षिक कार्यक्रम आइतबार स्कुल प्राङ्गणमा भव्य रूपमा समापन भएको छ । शुक्रवारदेखि सुरु भई तीन दिनसम्म लगातार चलेको कार्यक्रममा विद्यार्थीहरूले सांस्कृतिक, शैक्षिक र अतिरिक्त क्रियाकलापहरू प्रस्तुत गरेका थिए ।

पहिलो दिन भएको कार्यक्रमको उद्घाटन वीरगञ्ज महानगरपालिकाका प्रमुख राजेशमान सिंहले गरेका थिए भने दोस्रो दिनको कार्यक्रमको उद्घाटन सशस्त्र प्रहरी बल नेपाल नम्बर १३ गण हेडक्वार्टर पर्साका प्रमुख सशस्त्र प्रहरी उपरीक्षक (एसपी) राधेश्याम धिमालले गरेका थिए ।

कार्यक्रममा कक्षा नर्सरीदेखि कक्षा ९ सम्मका ११ सय भन्दा बढी विद्यार्थीहरूले विभिन्न सांस्कृतिक नृत्य, गीत, नाटक लगायतका अन्य सृजनात्मक प्रस्तुतिहरू मार्फत आफ्नो प्रतिभा प्रदर्शन गरेका थिए । साथै, कार्यक्रममा वर्षभरि सञ्चालित शैक्षिक तथा अतिरिक्त क्रियाकलापहरूको समीक्षा पनि गरिएको थियो ।

तेस्रो दिनको कार्यक्रमका प्रमुख अतिथि जिल्ला प्रहरी कार्यालय पर्साका प्रमुख, प्रहरी उपरीक्षक ९एसपी० गौतम मिश्रले गौतम स्कुलले ४८ वर्षदेखि शिक्षाको क्षेत्रमा पुर्‍याएको योगदान प्रशंसनीय रहेको बताए । विद्यार्थीहरूमा देखिएको सृजनशीलता र आत्मविश्वासले आफू निकै प्रभावित भएको पनि उनले बताए ।

यसै गरी, स्कूलका कार्यकारी निर्देशक सोनाम लामाले विद्यार्थी र शिक्षकहरूको मेहनतको प्रशंसा गर्दै आगामी दिनमा थप प्रभावकारी शैक्षिक योजना र रचनात्मक कार्यक्रमहरू सञ्चालन गर्ने प्रतिबद्धता व्यक्त गरे । 

कार्यक्रममा वडा प्रहरी कार्यालय श्रीपुरका प्रहरी निरीक्षक श्याम कुमार बस्नेत, जिल्ला ट्राफिक प्रहरी कार्यालय पर्साका प्रमुख प्रहरी उपरीक्षक गुननिधि खकुरेल, कृषि वैज्ञानिक विश्वेश्वर प्रसाद यादव, एड्स बी मिडिया प्रालिका संस्थापक निर्देशक हिमांशु बरनवाल, अधिवक्ता विनय सिंहलगायतले पनि आफ्नो मन्तव्य राखेका थिए ।

त्यस्तै कार्यक्रममा समाजसेवी, अभिभावक, विभिन्न स्कूलका शिक्षकहरू र मिडियाकर्मीहरूको उल्लेख्य सहभागिता रहेको थियो । कार्यक्रमको सहजीकरण गौतम स्कूलका शिक्षक सौराज प्रधानले गरेका थिए ।