वीरगञ्ज । जिल्ला प्रहरी कार्यालय बाराले विशेष सूचनाको आधारमा लागूऔषध गाँजाको ओसारपसारमा संलग्न चार जनालाई पक्राउ गरेको छ ।

पक्राउ परेकाहरूबाट २५ किलोग्राम गाँजा बरामद गरिएको बारा प्रहरीले प्रहरीले जनाएको छ । 

प्रहरी चौकी पथलैयाबाट खटिएको टोलीले जीतपुरसिमरा उपमहानगरपालिका – १ पथलैया चोकमा नारायणगढबाट वीरगञ्ज तर्फ आउँदै गरेको बा ४ ख ७५१७ नम्बरको यात्रुबाहक बस रोकेर चेकजाँच गर्ने क्रममा प्रहरी वरिष्ठ नायब निरीक्षक रोशन अधिकारीको कमान्डमा खटिएको टोलीले बसको सिटमुनि लुकाइएको अवस्थामा २१ किलो गाँजा फेला पारेको थियो ।

गाँजासहित तीन जनालाई नियन्त्रणमा लिइएको बारा प्रहरीले एक प्रेस नोट मार्फत जानकारी गराएको छ । पक्राउ पर्नेहरूमा मकवानपुरको राक्सिराङ गाउँपालिका – १ निवासी ४० वर्षीय अर्जुन रूम्बा, सोही ठाउँका ३४ वर्षीय राजु लामा र ३१ वर्षीय प्रदीप मोक्तान रहेका छन् ।

अर्जुनसँग दुई पोका र अन्य दुई जनासँग एक(एक पोका गाँजा बरामद भएको बारा प्रहरीको प्रेस नोटमा उल्लेख गरिएको छ ।

त्यसैगरी इलाका प्रहरी कार्यालय अमलेखगञ्जबाट प्रहरी वरिष्ठ नायब निरीक्षक टेक बहादुर कार्कीको कमान्डमा खटिएको टोलीले जीतपुरसिमरा उपमहानगरपालिका – २९ अमलेखगञ्ज चोकमा शङ्कास्पद पैदल यात्रीलाई रोकेर चेकजाँच गर्ने क्रममा पर्साको वीरगञ्ज महानगरपालिका – १८ इनर्वा निवासी २१ वर्षीय राजकिशोर कुर्मीको झोलाबाट ४.९ किलो गाँजा बरामद गरेको छ ।

पक्राउ परेका चारै जनामाथि लागूऔषध मुद्दा दर्ता गरी बारा जिल्ला अदालत कलैयाबाट ७ दिनको म्याद थप गरिएको बारा प्रहरीले जनाएको छ ।