वीरगञ्ज । आफ्नो समापनतर्फ उन्मुख हुँदै गरेको महाकुम्भ मेलामा तिर्थालुहरूको आगमन दरमा भने कुनै कमी आएको छैन । फागुन १६ गते मेला समापनसम्ममा सहभागीहरूको कुल सङ्ख्या ६५ करोड नाघ्ने अनुमान गरिएको छ ।

शनिवार, महाशिवरात्रिको अन्तिम आधिकारिक स्नान अघि लाखौँ भक्तजनहरूको भीड प्रयागराजमा ओइरिएको थियो ।

शनिवार साँझ ८ बजेसम्म मेलाको सुरुआतदेखि सङ्गममा पवित्र स्नान गर्ने भक्तजनहरूको कुल सङ्ख्या ६०।७४ करोड पुगेको थियो । भारत सरकारले प्रारम्भिक रूपमा ४० देखि ४५ करोडको अनुमान गरे पनि, फेब्रुअरी ११ मा नै यो सङ्ख्या पार गरिएको थियो ।

अहिले, मेलाको समापनसम्ममा यो सङ्ख्या ६५ करोड नाघ्ने अपेक्षा गरिएको छ ।महाकुम्भमा नेपालबाट पनि ठूलो सङ्ख्यामा तिर्थालुहरूको सहभागिता रहेको छ ।

नेपालका सर्वसाधारण, उद्योगी, व्यापारी, नेता, र खेलाडीहरू महाकुम्भमा सहभागी भएका छन् । नेपालबाट हवाई र सडक मार्ग हुँदै दैनिक रूपमा धार्मिक पर्यटकहरू प्रयागराज गइरहेका छन् ।

वीरगञ्ज, नेपालगञ्ज, भैरहवा, जनकपुर, विराटनगर लगायतका नाकाबाट भक्तजनहरूको प्रयागराज पुग्ने क्रम अहिले पनि जारी रहेको छ । धर्मप्रति वृद्ध वृद्धाको विशेष रुचि भए पनि, सामाजिक सञ्जालमा महाकुम्भको प्रचारका कारण युवाहरूमा पनि आकर्षण देखिएको छ ।

महाकुम्भ मेलामा सहभागी हुने भक्तजनहरूको अपार भीडले धार्मिक आस्था र समर्पणको अद्वितीय उदाहरण प्रस्तुत गरेको छ । सरकारी अनुमानभन्दा धेरै तिर्थालुहरूको सहभागिताले प्रयागराजको व्यवस्थापन प्रणालीमा ठूलो चुनौती खडा गरेको छ ।