वीरगञ्ज । लायन्स क्लब अफ वीरगञ्ज सेस्मी एकेडेमी, विजयपथ र ग्रीन क्याम्पसले आइतबार वीरगञ्ज कपडा बैङ्कलाई कपडा सहयोग गरेको छ ।

लायन्स क्लब इन्टरनेशनल डिष्ट्रिक्ट ३२५ एसका रिजन चेयरपर्सन लायन विजय कुशवाहा, डिष्ट्रिक्ट डेपुटी चिफ लायन आश्मा सिंह यादव, जोन चेयरपर्सन लायन सल्मा खातुन, एरिया चिफ लायन श्याम गुप्ता, लायन विनित जयसवाल, लायन उमेश साह कानुले कपडा बैङ्कको कार्यालय मै पुगेर २ बोरा र १ झोला कपडाहरु बैङ्कका अध्यक्ष लालबाबु सिंहलाइ हस्तान्तरण गरेका हुन् ।

सो अवसरमा वीरगञ्ज कपडा बैङ्कका सचिव कन्हैया पटेल, सदस्य अभिलाश गुप्ता र कर्मचारी शोभा देवि लगायतको सहभागीता रहेको थियो ।

जोन चेयरपर्सन लायन सल्मा खातुनले वीरगञ्ज कपडा बैङ्कले विगत लामो समय देखि दिन दु:खी असहाय, आगलागी तथा बाढी पिडितहरुको घरदैलोमा पुगेर गरिरहेको निस्वार्थ सेवा भाव प्रती कृतज्ञता ज्ञापन गरिन् ।

उनले भनिन्, ‘हामी कपडा बैङ्कको कामदेखि असाध्यै खुशी छौ र अहिले चिसोको समयमा बिपन्न असहायहरुलाई न्यानो कपडाको  आवश्यक्ता पर्ने हुँदा त्यही अवस्थालाई लक्षित गरेर हामीले केही कपडा सहयोग गरेका हौँ ।’वीरगञ्ज कपडा बैङ्कलाई सहयोग गर्न पाउँदा खुशी लागेको बताउँदै उनले अरुलाई पनि सकेसम्म सहयोग गर्न अपिल गरिन् । 

सेस्मी स्कुलकी प्रिन्सीपल समेत रहेकी लायन आश्मा सिंह यादवका अनुसार दिन दुःखी असहायको सेवा गर्नु नै मानवता हो । यही मन्त्रमा आधारित रहेर लायन्स क्लबले पनि विभिन्न सामाजिक कार्य गर्दै आएको उनले बताइन् ।