वीरगञ्ज । सङ्घीय सरकारका खानेपानी मन्त्री प्रदीप यादवले नवनिर्मित विवाह भवनको उद्घाटन गर्नुभएको छ ।

वीरगञ्ज महानगरपालिका वडा नम्बर १४, बहुअरीमा नवनिर्मित मुस्लिम समुदायको सांस्कृतिक, धार्मिक र सामाजिक आवश्यकताहरूलाई मध्यनजर गर्दै निर्माण विवाह भवनको खानेपानी मन्त्री प्रदीप यादवले उद्घाटन गर्नुभएको हो ।

उद्घाटन समारोहमा भवनको महत्त्व र उद्देश्यबारे बोल्दै मन्त्री यादवले भवन केवल इँटा र सिमेन्टको संरचना मात्र नभएर यहाँको समुदायका लागि एक अवसर र आशा भएको बताउनुभयो ।

उहाँले भन्नुभयो, ‘यस भवनले मुस्लिम समुदायका सांस्कृतिक गतिविधिहरूलाई प्रोत्साहन गर्दै, उनीहरूको सामाजिक संलग्नता र एकतालाई अझ सुदृढ बनाउनेछ ।

भवनमार्फत समुदायको विशेषता झल्काउन र यहाँको संस्कृति तथा परम्परालाई संरक्षण गर्न महत्त्वपूर्ण योगदान दिनेछ ।"

पर्सा निर्वाचन क्षेत्र नम्बर १ का प्रतिनिधिसभा सदस्य समेत रहनुभएका मन्त्री यादवको संसदीय पूर्वाधार विकास कोष र वीरगञ्ज महानगरपालिकाको संयुक्त लगानीमा निर्माण भएको भवनको मुख्य उद्देश्य समाजका सबै वर्गलाई समान पहुँच र सुविधा उपलब्ध गराउनु भएको बताउनुभयो ।

‘यो भवन स्थानीय स्रोत र सहकार्यबाट निर्माण गरिएको उत्कृष्ट उदाहरण हो, जसले समुदायको आवश्यकतामा केन्द्रित परियोजनाहरूको महत्त्वलाई उजागर गर्छ,’ उहाँले भन्नुभयो ।

वीरगञ्ज महानगरपालिकाका मेयर राजेशमान सिंहले महानगरको प्रतिबद्धता र उद्देश्यलाई स्पष्ट पार्दै भन्नुभयो, ‘महानगरपालिकाको विकास नीति सबै समुदाय र वर्गका लागि समान रूपमा लाभदायक हुने गरी भवन तयार पारिएको छ । हामी यहाँको विविध समुदायका आवश्यकता र इच्छाहरूलाई सम्बोधन गर्न निरन्तर प्रयासरत छौँ ।’

भवनको निर्माणले मुस्लिम समुदायको सांस्कृतिक, धार्मिक र सामाजिक परम्पराहरूलाई सम्मानजनक रूपमा अघि बढाउन मद्दत पुर्‍याउनेछ विश्वास व्यक्त गर्दै उहाँले थप्नुभयो, ‘हामी वीरगञ्जलाई समावेशी, सुरक्षित र समृद्ध महानगरको रूपमा विकसित गर्न चाहन्छौँ, जहाँ प्रत्येक समुदायले सम्मानपूर्वक आफ्नो परम्परा र पहिचानलाई जोगाउन सक्छ ।’

६० लाख रुपैयाँको कुल लागतमा निर्माण गरिएको यो भवनमा एउटा विशाल सभा हल र दुई वटा अतिरिक्त कोठा छन्, जसले विवाह, सभा, धार्मिक तथा सामाजिक कार्यक्रमहरूको आयोजना गर्न सुरक्षित र सुविधाजनक स्थान प्रदान गर्दछ ।

वडा सदस्य कुन्दन पटेलले जानकारी गराएअनुसार, यस भवनले समुदायको सुविधा अभावलाई पूरा गर्दै धार्मिक र सांस्कृतिक कार्यक्रमहरूको व्यवस्थापनमा सहयोग गर्नेछ ।

उद्घाटन समारोहमा पूर्व जिल्ला समन्वय समिति प्रमुख नेक महम्मद अन्सारी, पूर्व प्रदेश सभा सदस्य जनत अन्सारी, मधेस प्रदेशका ऊर्जा, सिँचाइ तथा खानेपानी मन्त्रालयका सचिव जक्की अहमद अन्सारी, जसपाका वीरगञ्ज महानगर अध्यक्ष ईश्वर चन्द्र यादव लगायतका विशिष्ट अतिथिहरूको उपस्थिति रहेको थियो ।