वीरगञ्ज । वीरगञ्जको नारायणी अस्पतालमा ३० करोड रुपैयाँमा खरिद गरिएको एमआरआई मेसिन चार महिनादेखि प्रयोग विहीन अवस्थामा अलपत्र परेको छ ।

सङ्घ सरकारको स्वास्थ्य मन्त्रालय मातहतको स्वास्थ्य सेवा विभागले टेन्डर आह्वान गरी आपूर्तिकर्ता लुम्बिनी हेल्थ केयर प्रालि मार्फत खरिद गरेको एमआरआई मेसिन नारायणी अस्पतालमा गत चैत अन्तिम हप्ता नै आइपुगेको थियो । तर अस्पताल प्रशासनको लापरबाहीका कारण उक्त मेसिन अहिलेसम्म पनि सञ्चालनमा भने आउन नसकेर अलपत्र परेको हो ।

यसअघि गत जेठ २५ मा अस्पताल प्रशासन स्वयंले एक सूचना नै जारी गरेर अस्पतालमा एमआरआई सेवा गत असार १५ गतेदेखि नै सुरु गरिने जानकारी गराएको थियो । तर अस्पताल प्रशासनले जारी गरेको उक्त सूचनामा उल्लेख गरिएको मिति बितेको तीन हप्ता भइसक्दा पनि एमआरआई सेवा सुरु हुन सकेको छैन ।

अस्पतालको भवनमा एमआरआई कक्ष तयार गरी एमआरआई मेसिन जडान गरिसकिएको भए पनि उक्त मेसिन सञ्चालनका आवश्यक जेनरेटरको व्यवस्थापन हुन सक्दा मेसिन प्रयोगविहीन अवस्थामा अलपत्र परेको हो ।

अस्पतालमा एमआरआई मेसिन आपूर्ति गरेको आपूर्तिकर्ता लुम्बिनी हेल्थ केयर प्रालिका प्राविधिक इन्जिनियर विनोद चौधरीका अनुसार एमआरआई मेसिन सञ्चालनका लागि ५०० केभिए क्षमताको जेनरेटर चाहिन्छ । चौधरीले भने, ‘मेसिनलाई २४ सै घण्टा चिसोमा राख्नुपर्छ, यदि १० मिनेट पनि पावर सप्लाई बन्द भयो मेसिनबाट अति संवेदनशील र महँगो लिथियम ग्याँस लिक भई हाल्छ, जसले ठुलो क्षति हुनसक्छ, त्यसका कारण यो मसिनका लागि ५०० केभीए क्षमताकै जेनरेटर चाहिन्छ ।’

तर हाल अस्पताल प्रशासनसँग २०० केभीए क्षमताको मात्रै जेनरेटर छ । उक्त जेनरेटरबाटै अस्पतालका विभिन्न कक्षमा विद्युत् आपूर्ति भइरहेको छ । त्यस कारण एमआरआई मेसिनलाई आवश्यक विद्युतीय ऊर्जा उक्त जेनरेटरबाट आपूर्ति हुन सक्ने अवस्था नभएकाले छुट्टै ५०० केभीए क्षमताको अर्को जेनरेटर नै आवश्यक भएको इन्जिनियर चौधरीले बताए ।

अस्पतालका मेडिकल सुपरिटेन्डेन्ट (मेसु) डाक्टर चित्तरञ्जन साह अनुसार एमआरआई कक्षमा मेसिन जडान कार्य सकेर एक महिना पहिले २०० केभीए क्षमताकै जेनरेटर चलाएर मेसिनको परीक्षण गरिएको थियो । तर त्यस क्रममा आवश्यक विद्युतीय ऊर्जा नपुग्दा मेसिनबाट हिलियम ग्याँस लिक भएको थियो ।

मेसिन सञ्चालनका लागि चाहिने ५०० केभीए क्षमताको नयाँ जेनरेटर खरिदका लागि आवश्यक बजेट अस्पतालसँग  हाल उपलब्ध नभएको अस्पतालका मेसु साहले बताए । बजेटको व्यवस्थापन नहुँदा सम्मका लागि अस्पताल प्रशासनले मासिक ४ लाख ५० हजार रुपैयाँ भाडा तिर्ने गरी ५०० केभीए क्षमताको जेनरेटर ल्याएर अस्पतालमा राखेको छ । तर भाडामा जेनरेटर ल्याएको दुई हप्ता बितिसक्दा पनि एमआरआई मेसिन सञ्चालन गरिएको छैन ।

अस्पतालका मेसु साहले लिक भएको हिलियम गयाँस रिफल गर्न (फेरि भर्न) आपूर्तिकर्ता कम्पनीले विलम्ब गरिरहेको बताए । उनले भने, ‘आपूर्तिकर्ता कम्पनीलाई दुई हप्ताको समय दिएका छौँ, त्योभित्र उसले ग्याँस रिफिल गरिसक्छ ।’