वीरगञ्ज । वीरगञ्जस्थित श्रीराम अस्पतालको आयोजनामा शनिवार भएको रक्तदान कार्यक्रममा ३५ जनाले रगत दान गरेका छन् ।

श्रीराम अस्पतालले आमा सुरक्षा कार्यक्रम सुरु गरेको एक वर्ष पुरा भएको उपलक्ष्यमा शनिवार आयोजना गरेको रक्तदान कार्यक्रममा ३५ जनाले रगत दान गरेको अस्पतालकी सञ्चालक डाक्टर दीप्ति यादवले जानकारी दिइन् ।

रगत दान गर्नेहरूमा डाक्टर सुनिल यादव, डाक्टर मनिष खन्ना, अनिल पटेल, राधा श्रेष्ठ, एञ्जीला पटेललगायतका रहेको रक्त सञ्चार केन्द्र वीरगञ्जले जनाएको छ ।

श्रीराम अस्पतालले एक वर्ष अघिदेखि आमा सुरक्षा कार्यक्रम सुरु गरेकोमा हालसम्म सयौँ गर्भवती आमाहरूलाई सुरक्षित प्रसूति सेवा प्रदान गरिएको अस्पतालकी सञ्चालक डाक्टर यादवले जानकारी दिइन् ।

आमा सुरक्षा कार्यक्रम एक वर्ष पुरा भएको अवसरमै शनिवार अस्पतालले विभिन्न व्यक्तित्वहरूलाई सम्मानित समेत गरेको छ ।

अस्पतालले समाजसेवी प्रकाश थारु, वीरगञ्ज युवा समाजका संस्थापक कमल चौगाईं, सञ्चारकर्मी आबिद हुसेन, राजु खण्डेलवाल, हेमा थापा, सौरभ राज पाण्डे र राजन श्रीवास्तवलाई सम्मानित गरेको हो ।